هند عبد الغني تكتب : الفنان سامح حسين / إخوان

خرج علينا الفنان سامح حسين ببرنامج رمضانى خفيف اسمه” قطايف سامح ”
والبرنامج اتناول موضوعات متنوعة منها البر والعقوق سواء من الاباء او الأبناء

وموضوعات تخص العلاقات الاجتماعية والعلاقة بين الزوجين وغيرها من الموضوعات بيتناولها بشكل بسيط وسلس ….
لحد ماتناول موضوع بسيط عابر يخص الاخلاق والمبادئ وقبلها القيم الدينية وهى الحدود بين الرجل والمرأة.

على سبيل المثال /
لاصداقة بين المرأة والرجل
الزمالة لها حدود
ابن العم يظل من المحارم
والراجل ملوش واحدة يعرفها من زمان وبيتكلم ويحكى معاها
وغيرها من من القيم اللى بينص عليها الدين اصلا حتى لو لم نعمل بها لكنها دين وثوابت.

السؤال هنا / ليه تم الصاق اسم الفنان على أنه إخوان !!!؟؟
وهل حضراتكم شايفين ان الإخوان كانوا بيطبقوا ثوابت الدين فعلا !!؟؟

وهل رايكم ان وضعنا الحالى المليان بنسب الخيانة و نسب الطلاق وبعدنا عن ربنا هل احنا كدة بخير !!؟؟
هل انتم مبسوطين بوضع الاسرة المفككة بالشكل المتدنى دة !!؟؟

ان كنتم بخير كدة ومرتاحين بوضعكم كدة فانسوا كل النصايح وكل الكلام عن الدين والأخلاق والمبادئ …
واعتبروا الفنان اخوان ولا حتى من اهل قريش براحتكم.

لكن زى ماقال الفنان سامح حسين الصح صح ولو بتعمله لوحدك والغلط غلط ولو بيعمله كل الناس
وبلاش بقى النغمة دى كل مايظهر انسان محترم يحاول يهدينا وياخد بأيدينا للطريق الصح إن ضلينا تحاولوا تبعدوه.