هند عبد الغنى تكتب: الزارع حاصد

صحيح اللى بيزرع بيحصد وصحيح انك حتجنى كل شئ عملته فى حياتك خاصة فى ولادك
وصحيح كمان ان صلاح حال ولادنا دة من أعظم انواع الرزق
ورغم انى مؤمنة بكل دة ومؤمنة ان كتير من الآباء والأمهات مقصرين فى دورهم ف تربية ولادهم
وان كتيييير منهم بيربوا القاب وبس
حضرة الباشمهندس وحضرة الدكتور وحضرة الظابط وحضرة السفير وغيره وغيره …

أحب اقول طظ فى كل حضرة …..من غير تربية
اه طظ فى كل مسمى وظيفى من غير أخلاق
طظ فيه مهما وصل لفين لو طلع معدوم الضمير
طظ فيه لو اتعدمت عنده الانسانية والرحمة
طظ فيها لو وصلت لأعلى مكانة علمية واتعودت تخرج كاشفة سرتها
وتتباهى بسوء تربيتها
وطظ كبيرة لو طلعته حافظ مش فاهم

عادى يحفظ قرآن ويعمل كل موبيقات الحياة …ايه الفايدة
طظ فى اى تربية واى أخلاق تكون عبارة عن شكل ومظاهر وبس ….
ورغم ايمانى ويقينى الكامل بكل الكلام دة الا ان اللى ربنا بيمد ايده فى التوفيق ف صلاح حال ولاده بيكون سبب لهدايتهم ….
اللى احنا بنعمله اننا بناخد بالاسباب

ونعدل ونقوم سلوك ونعمل اللى أمرنا بيه ربنا سبحانه وتعالى
لكن زيه زى الامتحان بنذاكر والنتيجة مش بتاعتنا احنا بس بنعمل اللى علينا….

سيدنا نوح حاول كأب يدعى لابنه وبنقذه لكن منجحش ف دة ….ومرماش نفسه فى البحر معاه هو حيسأل عن دعوته ليه
احنا مخلوقين وموجودين وعلينا التزام تجاه أولادنا دة امر الهى علينا تنفيذه مهما كانت النتيجة
” كلكم راع وكلكم مسؤل عن رعيته ”

اصل الجنة غالية اوى وبابها مش اى حد حيفوت منه الا برحمته
والنار مستنية كتيييير ربنا ينجينا منها ويباعد بينا وبينها …
ولادنا أمانة وسيرتنا الباقية.