دكتورة سماح بشاى تكتب: فكرة

بمناسبة زيادة أعداد المشردين في الشوارع؛ واللي بالفعل أصبحت ظاهرة مقلقة ومزعجة جداً، لكونها تمثل مشكلة حقيقية من الناحية الأمنية وكمان تأثيرها على المظهر الحضاري للشارع المصري كانعكاس للأزمة الاقتصادية وتداعياتها على حالة المواطن .

المهم جات لي فكرة حبيت اشاركها معاكم يمكن تكون حل ولو مؤقت للموضوع ده
ممكن الدولة ممثلة في وزارتي الأوقاف والداخلية يعيدوا تفعيل منظومة (التكية المصرية)

بس هتتعمل بنظام حديث يتيح للدولة معرفة أعداد المشردين الفعلية وهوياتهم من خلال تسجيلهم كلهم ضمن (نظام system )
ده هيبقى عبارة عن إيه؟

الدولة هتخصص أماكن زي مباني أو شوادر تعمل فيها مبيت بسيط لكن آدمي، يحمي الناس من نومة الأرصفة وتحت الكباري، وكمان حمامات لقضاء الحاجة والاستحمام وغسل الملابس، وأهل الخير هيقدروا يساهموا في توفير احتياجات الناس دي من وجبات الطعام وأدوات النظافة وما يلزم لإعالتهم لحين توفير وظائف لهم أو حل مشكلة السكن
طيب وده فايدته إيه؟

أولا
تسجيل الكل على السيستم هيساعد في حصر وتصنيف المشاكل والتحديات اللي بتواجه الدولة في موضوع المشردين والشحاتين وأطفال الشوارع وكل ما يتعلق بالملف ده من مشاكل اجتماعية وأمنية .

وده بالمناسبة هيسهل جدا القبض على الخارجين عن القانون لأنهم أكيد هيفضلوا الاستمرار في قعدة الرصيف بدلاً من الانضمام للتكية وبالتالي تسهل رؤيتهم وملاحقتهم.

ثانيا
هتقدر تحدد احتياجات الفئة دي من المهمشين واللي داسهم قطار الأزمة الإقتصادية من سكن لوظائف لمصاريف تعليم لعلاج
هنعرف من بياناتهم أعمارهم ومستواهم التعليمي ونقدر نؤهل كتير منهم لسوق العمل ونوجد لهم وظائف وبالتالي هيخرجوا بعد فترة قصيرة من منظومة ” التكية ” كأفراد فاعلين في المجتمع بدلاً من تركهم للتحول بالتدريج في شوارعنا من عالة على المجتمع إلى طاقات تخريبية تهدد سلامة الوطن بأكمله.

ثالثا
هتساعد أهل الخير إن جهودهم تكون مثمرة لأنهم مش هيلفوا في الشوارع ولا هيحتاروا مين مستحق ياخد ومين لأ

اللي جوة التكية هيكون معدود ومتسجل وحاجته بتوصل له بنظام وأمان
واللي برة بقينا عارفين هو مش عاوز ينضم للمنظومة ليه

الفكرة كويسة وبقى لها فترة بتتقلب في دماغي، ولها تفاصيل وأبعاد كتير يمكن معرفتش اوضحها كلها في المنشور ده
بس تستاهل نفكر فيها ونقيم إمكانية تنفيذها.