هند عبد الغني تكتب : إنتخبونى أنا
من واحنا صغيرين كنا بنعرف انتخابات البرلمان من الدعاية والإعلان وغيرها…
بس كتير كنا بنسمع عن إعادة بين مرشحين او نجاح ساحق لناس اسمها معروف فى دايرتها .
وكان الإقبال شديد وتزاحم على العملية الانتخابية…
لكن دلوقتى كلنا بنقول لكلنا النتيجة معروفة…
حتى الإعلام طلعوا اشادوا بالنزاهة .. وبعد كلام الرئيس قالوا فعلا الانتخابات محتاجة وقفة…ايه كمية التضليل دى
عندى بس كام استفسار محتاجة توضيح ..
١/ مين حيترشح لو تم الغاء الحصانة!؟
٢/ هل كم المكاسب كتير جدا لدرجة التضحيات اللى بيقدمها المرشح او بعضهم
٣ / ليه مش من حق الدايرة تقدم استبعاد المرشح فى نص الفترة مثلا لو لم يفيد اهل الدايرة .
عايز تعرف حقيقة انسان امنحه منصب ، مال ، نجاح ، سلطة وراقبه كويس حتلاقيك غالبا متعرفوش من الأساس
علشان اى انسان فى ضعفه ملاك
وف فقره ناسك
وف عجزه ولي
وف طريق الوصول مكافح يتغنى بالرضا والقناعة والزهد
لكن حقيقته بتظهر اذا جيبه امتلئ او بقى مفتوحله باب سلطان او اتحجزله كرسى فوق اعناق العباد وقتها بس حتشوف الوشوش على حقيقتها وحيخرج الكائن المستتر جواه
وقتها تظهر جناحات السلام او انياب ومخالب المفترس..
السلطة شبه الخمور تسكر الروح
والمال بينزع البراءة والزينه من الملامح
ناس كتير طول ماهى بسيطة تشوفها بشوشة متواضعة وبعد ماتتغنى تتكبر وتتعالى ..
اختبارات الحياة هى اللى بتفضح معادن الناس
العظمة بقى بجد هى ان شأنك يرتفع وتفضل قريب ومعطاء وهين والبطولة ان الشيطان يفضل معاك طول الليل يوسوسلك وانت تقاوم وتصحى نقى وأمين زى ما انت..
قبل ماتقول انتخبونى انا أظهر حقيقتك ومعدنك ومبادئك والاكتر محتاج تظهر نيتك بعدها مش حتكون محتاج اصلا تطلب من حد ينتخبك علشان الناس هى اللى حتطلب انك تكون خير من يمثلهم مش يمثل عليهم .
