هند عبد الغني تكتب : أمى وأنا وبنتى

أمى ربنا يديها الصحة والعمر الطويل يارب .. ست زيها زى ستات كتير( أمية) لا تقرأ ولا تكتب ..
واحنا ٦ أبناء فكانت حريصة جدا انها تدينا اللى اتحرمت منه( العلم والمعرفه ) .

ولما كانت بتركز معانا احنا كبنات علشان نتعلم كويس ونذاكر ولما كنا نسألها يعنى الشهادة حتعملنا ايه ياماما !!؟

مااحنا حنعلقها على الحيط ديكور وحنتجوز يبقى ايه لازمتها؟..
انا فاكرة ردها عليا كانت تقول حتى لو حتعلقيها على الحيط اديكى حتعرفى تعلمى ولادك كويس وتتعاملى معاهم افضل .

واهى شهادة معاكى يعنى سلاح للدنيا لو لاقدر الله اتحوجتى حتنفعك
وربنا مايحوجك يابنتى ابدا لكن على الاقل ديننا بيقولنا نتعلم و شهادتك حتنفعك لو لاقدر الله الدنيا مبقتش حلوة معاكى .

واول ايه كانت اقرأ ..وحتعرفى تعلمى ولادك افضل بكثييير
اخدت الكلام من أمى وانا صغيرة ولما كبرت واتجوزت وخلفت بنت علمتها وماشاء الله اتخرجت دكتورة اسنان تقر العين ربنا يحفظها ويفرحها…ولقيتنى بقولها نفس كلام أمى .

بس لقيت امهات كتير بتنصح بناتها نصيحة تهد البيت قبل مايتبنى
لازم تشتغلى وتستقلى ماديا لحد هنا يعنى كل إنسان وعنده الحريه والفكر الخاص بيه ماشى الحال .لكن الباقى بيصدم ..
لازم تكونى معاكى فلوس ومأمنة نفسك علشان لو جوزك غدر بيكى تعرفى تعيشى .

وكأن البنت مش داخلة تبنى دى داخلة على معركة وشرسة كمان
امهاتنا علمونا اننا حنقف جنب بعض فى الأزمات كتف بكتف ..لكن دلوقتى البنات اتربت على انك داخلة منعطف مش حلو فى حياتك ولازم تكونى حذرة وووووو كلام غريب .

صحيح ان كتير من التجارب أكدت ان بعض البنات اتظلموا فى حياتهم الشخصية وان لولا انهم اتعلموا واشتغلوا كان وضعهم حيكون صعب ..وعارفة ان المحاكم المصرية أرضها اشتكت من كتر زوارها
لكن المبدأ فى الزواج الاستقرار والنية الطيبة بتمهد لحياة هادية
همسة فى اذان الامهات علموا البنات كويس وعرفيها انها حتكون سند لزوجها مش داخلة ند خالص لعل البيوت تهدأ وتعمر…..