هند عبد الغني تكتب : هل أنت إستثنائي
بنسمع كتير الكلمتين دول انت استثنائى
فهل فعلا انت شخص استثنائى !!
هل فعلا لو حد قالك انت استثنائى هو فاهم قاصد ايه !!
الحقيقة حبايبنا بتوع التسويق والدعاية والتنمية البشرية احيانا بيطلعوا يسمعونا مصطلحات ماانزل الله بها من سلطان منها
خليك عظيم علشان تبقى شخص استثنائى زى ناس كتير التاريخ ذكر انهم استثنائيين…
والحقيقة انه كل الكلام دة كلام تسويق والسلام وملوش اى اساس من الصحة ..لان ان جينا للحق الاستثناء الوحيد هو
” من أوتى كتابه بيمينه ”
طب اسمع كدة الكلام اللى سيدنا النبى عليه الصلاة والسلام قاله ‘ رب اشعث اغبر مدفوع بالابواب لو اقسم على الله لأبره ‘
يعنى انسان بالمواصفات دى اللى لو فات جنبك فى الشارع مش حيلفت نظرك اصلا .
ممكن يقول يارب وفى نفس اللحظة ربك يرد عليك لبيك عبدى ..
اهو انسان اساسا مش ملفت للنظر ولا عمل حاجة علشان التاريخ يذكره لكنه الأقرب عند الله بقلبه دة مثال لانسان بسيط لاحيذكره التاريخ ولاغيره ..
لو عايز تبقى استثنائى بجد لما توصلك مصيبة حد استرها بلاش تفضح وتصور وتنشر .
أسعى للصلح بين الناس متبقاش عامل فتنة ..
انشر اى حاجة ايجابية بدل كم السلبيات ونشر سواد الدنيا
متخوفش الناس من بكرة مهما كانت ادلتك ومبرراتك لان النهاردة وبكرة وكل الحياة فى ايد رب الكون مش ف ايد حد فاطمئن مفيش حاجة حتحصل الا اللى ربنا حيكون كاتبها ….
اللى عايزة اقوله اعمل اى عمل واى شئ يسيبلك فى الحياة اثر طيب ويخليك راضى عن نفسك وبس مش علشان التاريخ يذكرك انك استثنائى ولا ان حد يشاور عليك ويقولك انت استثنائى ..
لكن حيبقى اثرك فى الدنيا وتجازى عليه عند رب مقتدر….
اعمل وانجح واكبر وتواضع وخليك عند نفسك عادى مش من باب استحقار ذاتك لكن من باب انك مستور فمهما كان فيك من صفات او عيوب فمهما الناس كبرتك وعظمتك لو ربك شال جزء صغير اوى من ستره عليك والله كل اللى انت فيه حيتلاشى ولاحتتشاف اصلا
انسى اللايكات والشهادات والثروة والشهرة
وافتكر حاجة واحدة انه علشان مغطيك برداء الستر فانت ناجح وواصل
انه علشان حاميك ومحبب الخلق فيك انت كدة دلوقتى
فاحمده لو شايف نفسك استثنائى لأنك باختصار انت عليك رداء الستر اللى محليك فى عيون الخلق.
